Græna leiðin (green open access) Handrit að grein er birt og gert aðgengilegt í varðveislusafni (t.d. í Opnum vísindum – varðveislusafni háskólanna eða Zenodo.org). Höfundur sendir varðveislusafninu lokagerð handrits (Pre-print) eða ritrýnt lokahandrit (Post-print/Accepted manuscript) sem tilbúið er til birtingar. Greinin er síðan gefin út í áskriftartímariti í endanlegri útgáfu en er jafnframt aðgengileg sem handrit í opnum aðgangi í varðveislusafninu. Stundum er birtingartöf á efni sé þessi leið farinn, en það er mismunandi eftir útgefendum (sjá nánar um birtingatafir).
Upplýsingar um útgáfustefnu einstakra tímarita, birtingartöf og hvaða útgáfu greina má vista í varðveislusöfnum er hægt að nálgast hjá Open policy finder (Jisc).
Gullna leiðin (gold Open access) Grein kemur út í opnum aðgangi í tímariti án endurgjalds eða hindrana fyrir notandann. Hins vegar getur kostnaður lagst á höfunda eða styrkveitanda, svokölluð þjónustugjöld vegna birtinga (Article processing charge – APC). Þessi leið er algeng og sú leið sem flestir stærstu útgefendu heims bjóða upp á. Hún getur hins vegar reynst dýr og eru dæmi um að birting greinar í gullnum opnum aðgangi hlaupi á hundruðum þúsunda króna fyrir höfund.
Demanta leiðin (diamond Open access) Opinn aðgangur sem svipar til gullnu leiðarinnar, nema með einni stórri breytingu, engin þjónustugjöld vegna birtinga leggjast á höfunda eða styrkveitanda. Höfundur heldur að jafnaði höfundarréttinum, í stað þess að framselja réttinn til útgefanda eins og í hefðbundinni útgáfu. Árið 2025 var gefinn út staðall fyrir birtingar tímarita í demanta opnum aðgangi (DOAS) í honum er ekki aðeins kveðið á um að birting eigi hvorki að bera kostnað með sér fyrir höfund, styrkveitenda eða lesendur, heldur eru einnig lagðar línur um gagnsæi í fjármögnun slíkra rita, eignarhald og fleiri atriða sem skipta máli til þess að tryggja að fræðin séu í raun og veru frjáls, opin og óháð.
Blandaða gullna leiðin (Hybrid Gold Access) Grein kemur út í hefðbundnu áskriftartímariti en höfundur/styrkveitandi borgar útgefandanum þjónustugjald (APC) fyrir birtingu í opnum aðgangi (sjá nánar um þjónustugjöld vegna birtinga). Landsaðgangur að rafrænum áskriftum (hvar.is) hefur staðið fyrir samningum við tvo útgefendur slíkar tímarita, Sage og Karger um að íslenskir höfundar geti gefið út greinar í opnum aðgangi í ritum þeirra án þess að þurfa að greiða apc gjöldin.
Brons leiðin Útgefendur hafa stundum greinar úr áskriftartímaritum opnar/ókeypis um óákveðinn tíma, gjarnan merktar Free access, en án nokkurra OA leyfa, þ.e. útgefandi getur án tafar ákveðið að loka aðgangi að grein þegar honum þóknast. Það er engin trygging fyrir því að grein sem er „opin“ í dag verði það áfram.