Hægt er að fara margar leiðir að því að birta í opnum aðgangi. Hér eru upplýsingar fyrir höfunda og útgefendur sem hafa hug á að velja þessa leið fyrir verk sín.
Höfundaréttur – sæmdarréttur, dreifingaréttur og afnotaleyfi
Höfundaréttur gegnir veigamiklu hlutverki í útgáfu með opnum aðgangi. Höfundaréttur skiptist annars vegar í sæmdarrétt höfundar þar sem meðal annars er kveðið á um að ekki megi setja verk höfundar í þannig samhengi að það skaði heiður hans og að höfundar sé ávalt getið. Þessi réttur er óframseljanlegur og ekki er þörf á að sækja um hann. Hinn hluti höfundaréttar er dreifingarétturinn, en höfundur getur framselt þeim rétti, oft gegn gjaldi. Opinn aðgangur gengur út á að höfundur þurfi ekki að framselja þessum rétti. Þess í stað veiti höfundur og útgefandi afnotaleyfi á verkið svo allir geti nálgast og nýtt það, með einföldum skilyrðum þó. Creative Commons afnotaleyfin eru stöðluð leið í þessum efnum.